مواسم المسئولين

جرت العادة فى مصر ان يبقى فيه مواسم لظهور المسئولين فى الاعلام -المقروء منه او المسموع او المرئى-يعنى اضرب لسعادتك مثال رفيع:
تلاقيك سعادة وزير التعليم يطلع اثناء موسم امتحانات الثانوية العامة.........
وسعادة وزير التعليم العالى يطلع فى موسم التنسيق او لو معرفناش نعتر على سعادته يطلع سيادة المسئول -او المسئوم - عن مكاتب التنسيق اصل عقبال امالتك وزير التعليم العالى بيعلم ولاده فى الخارج مش مقتنع بالتعليم فى مصر بلا وكسة...........
وحدث ولا حرج عن الحاج وزير الداخلية اللى يطلع اثناء تخريج اى نفر من الداخلية ..اكاديمية بقى ولا كلية ولا حتى امناء شرطة....وماتلاقيهوش اثناء حدوث تجاوز لضابط زى الحادثة الاخيرة بتاعة خالد سعيد.........
ولا ياسيدى على الاخبار الرياضية جدو راح الاهلى ..جدو لسه فى الاتحاد لدرجة انى كرهت جدو-الله يرحمه- ...جدى ابو ابويا يعنى .......ولاحتى ابو امى والله ما بتفرق عندنا
ام هند بقى - المهم يعنى- سيادة المسئوم ما يطلعش فى الفلفزيون الا لو فيه نصيبة حصلت -لاقدر الله- ولو ان النصايب بقت على قفا من يشيل فى البلد :
يعنى ما تشوفش خلقة وزير المالية الا وهو بيفرض ضريبة ...وااخرهم الضريبة العقارية.........شايف حضرته الناس مغتنية ومش عارفة تودى فلوسها فين فسعادته بيفرض ضريبة مش شايف اللحمة اللى بيحلم بيها كل فقير ولا

نظفظف حبيب هارتى اللى طول السنة الفحلقى اللى ياخويا يقوللك الاسعار هانخفضها على رمضان ولا حياة لمن تنادى

اصل احنا بقينا فى دولة تتعامل بالشفافية ويا خويا الدولة عاملة ودن من طين وودن من عجين

بمناسبة اللحمة انا خايفة ان فى عام 2015 او اقل من المدة دى ممكن تلاقى حد داخل السجن او دافع غرامة مش علشان كسر اشارة او مش لابس الحزا م او بسبب كيلو هيروين او كيلو حشيش ................لكن علشان الكحيان كان شارى كيلو لحمة!!!